Wasiat Corona

اللهم صل على سيدنا محمد

واله وصحبه وسلم وبارك عليه

Kaum muslimin muslimat
Hayu urang ningkat taat
gura giru urang tobat
tina dosa jeung ma'siat

Alam dunya eukeur geunjleung
Ku panyakit matak keueung
Virus Corona keur mangkreng
nyebar alahbatan wereng

Ulah geumpeur, tetep tenang
Tapi ulah nganggap gampang
Bisa jadi virus nyerang
Upami Alloh miwarang

Kukituna pek caketan
Alloh anu Maha Rohman
Usaha batin sarengan
Ku ngajaga kasehatan

Mun pareng rek udar ider
Boga wudhu masing angger
Dicadar tawa dimasker
Awak sehat, cageur bageur

Mun urang di zona aman
Sholat Jum'at pek lakonan
Kitu deui pangaosan
Hadir tong loba alesan

Kecuali Zona merah
Tempat darurat ku wabah
MUI masih pituah
Pek berjamaah di imah

Pamarentah ngabejaan
Lamun bubar ririungan
Ulah poho cuci tangan
Make sabun walatraan

Mugi Gusti ngahampura
Abdi sadar jeung rumasa
Awak bobolokot dosa
nu matak datang bencana